بوگون سیزلری بورا چاغیردیم چون قراردی موهوم بیر مسأله اوستونده دانیشاخ. سیزلرین نظرلریز منه چوخ ده‌یه‌رلی دی. قراردی آبدارخانا دا بیر اصلاحات اولونسون. بو اصلاحات دقیقاً ایستیکانلارین ده‌ییشماغینن باشلاناجاخ! سیز عزیزلریم منه دیین، ایستیکان‌لار قیرپلی اولسون یا قیرپسیز؟!
به گزارش موج ارس جلفا، بیز اوچ کیشی ایدوخ… نازلی جان… ای وای شرمنده! من گینه ده کیریخدیم «احمد کایا» گیلی دئدیم! بیزده اوچ کیشی ایدوخ: من، دؤهتور و مهندیس.
«رییس» بیزی چاغیردی اوتاقینا.
رییس: من همیشه دئمیشم کی ایکی فیکر، بیر فیکر دن یاخجی دی. اوچ فیکر، ایکی فیکر دن یاخجی دی…
من: دؤرد فیکر اوچ فیکر دن یاخجیدی…
رییس: آفرین! آفرین! دقیقا.ً من همیشه اعتقادیم وار ایشلر گرح «خرد جمعی» نن قاباغا گئده. دؤهتور جان من سنی ساغ الیم کیمین بیله‌رم. مهندیس دقیقاً سنده سول الیم سن. سنده کی {منه باخدی} ها ها ها ها!… خولاصه… بوگون سیزلری بورا چاغیردیم چون قراردی موهوم بیر مسأله اوستونده دانیشاخ. سیزلرین نظرلریز منه چوخ ده‌یه‌رلی دی. قراردی آبدارخانا دا بیر اصلاحات اولونسون. بو اصلاحات دقیقاً ایستیکانلارین ده‌ییشماغینن باشلاناجاخ! سیز عزیزلریم منه دیین، ایستیکان‌لار قیرپلی اولسون یا قیرپسیز؟!
دؤهتور: من اوّلده اؤز نوبه‌مده تشکور ائلیرم جناب رییس‌دن کی بو فورصتی بنده‌نین اختیاریندا قویدولار کی اؤز نظرلریمی اعلام ائلیه‌م، واقعاً بؤیوح بیر افتخاردی منه سیزین محضریزده اولماخ، سیزین ساغ الیز اولماخ. واقعاً بو جلسه‌لر کیلاسی درس کیمین بیر شئیدی، بنده چالیشیرام هئشواخ بو جلسه‌لری الدن وئرمیه‌م چون واقعاً تلمّذا ئلیروخ محضریزده. واقعاً سیزین فرماییش‌لریز میثلی بیر چیراغی دی کی در تاریکی روشن اولور! سورا دا عزیز یولداشلاردان تشکور ائلیرم کی وقتلرین منیم اختیاریم دا قویدولار، چوخ وقتیزی آلمیرام، دا آیری عرضیم یوخدی، ایستیکان‌لار دا نظریمه قیرپلی اولسون‌لار.
من: موزلاردان بویورون دا…
مهندیس: من دؤهتورون فرماییشاتی‌نین تکمیلینده گرح جناب رییسین هوش و ذکاوت میثال زدنی‌سیندن تشکور ائلیه‌م! جناب رییس بو آز مدت ده کی بوردادیلار، چوخ گؤزل شیرکتین موشکولون تاپیبلار و بارماخ قویوبلار دوز او نوقطه‌نین اوستونه کی موشکول‌لرین منبعی دی. آبدارخانا! قطعاً و یقیناً آبدارخانا به عنوان قلب تپنده‌ی بو شیرکت، اگر ایصلاح اولونسا، چایلار وقتینده گلسه، اونون تأثیرین شیرکتین راندمان عملکردینده گؤره‌جاغوخ، و قطعاً و یقیناً بو فقط جناب رییسین هوش مدیریتی‌سین‌دن ناشی اولونور، یانی بو دا بیر ذاتی استعداد دی کی حله حله بیرینده تاپیلماز. ایستیکان بحثینده من ده دؤهتورونن نظریم بیردی. ایستیکان اگر قیرپلی اولسا، بارماخ گئچر قیرپین ایچینه، ایشدی بیردن ایستیکان زویدی، بارماخ قویماز یئره دوشسون و سینماز! بودا قطعاً و یقیناً بلند مدت ده اقتصادی نظردن شیرکته چوخ منفعت یئتیرر.
(آغزیمدا کی موزی چئینییب چئینه‌مه‌میش اوتدوم گئتدی) اوهو… بلی… اوهو… والاه دئمه‌لی سؤزلرین هامیسین عزیز یولداشلار بویوردولار منه بیر سؤز قالمادی. من فقط بیر پیشنهادیم وار. مثلاً بیز گرح خاریجی مملکت‌لرین تجروبه‌لریندن فایدالاناخ. گرح گؤراخ اولار نئینیبلر کی «جهان اول» اولوبلار، بیز «جهان سوم»؟ مثلاً گؤراخ آلمان دا آبدارخانا ایشین نه جور حلله سالیبلار؟ چای ایشین نئینیبلر؟ مثلاً هانسی ایستیکان‌لار دا چای ایچیرلر؟ بونا دا منیم پیشنهادیم بودی کی ائله بو جمع ییغیشاخ گئداخ مثلاً آلمانا، اوردا دؤرد دانا شیرکتین آبدارخاناسینا باش ویراخ، تجروبه‌لری گتیراخ بوردا پیاده ائلیاخ. هله‌لیخ ایستیکان بحثینده من ده ائله قیرپلی ایستیکانی صلاح گؤرورم.
رییس: چوخ گؤزل بحث‌لری دی، آیری سؤز صؤحبت اولماسا من جمعبندی ائلیم… آآ نوروز… آآ نوروز تشریف گتی (نوروز آبدار چیمیزدی)…
نوروز: بلی آی ی ی رییس؟
رییس: سحر ایاغو قویارسان گورجولر بازارینا، بیر دست قیرپسیز ایستیکان آلیب گتیررسن، دقیقاً قیرپسیز اولسون ها! فاختور دا آلارسان…
دؤهتور: احسنت! واقعاً احسنت!
مهندیس: قطعاً و یقیناً بوجور پراگماتیست مدیر گلمیب گلمیه‌جاخ!
(من بیر آیری موز گؤتوروب سویدوم)
اگر این مطلب را مفید ارزیابی کردید لطفاً به اشتراک بگذارید :
خیلی عالی جناب آقای دکتر
طنز به همراه نکته های میق اجتماعی
واقعا جالب بود