- پایگاه اطلاع رسانی موج ارس جلفا - https://mojearasejolfa.ir -

حاجی اکبر کریمی حقی

به گزارش موج ارس جلفا [1]، یوخاری دا گئدن عونوان ۱۳۱۶/۱۰/۰۶ دا جولفا شهری نین حق وئردی آباد کندینده دونیایا گوز آچان حاجی اکبر کریمی حقی نین شعرلرینی احتوا ائدن کیتابین آدی دیر. مرحوم حاجی اکبر کریمی حقی آز ادعالی بلکه ده ادعاسیز بیر یازیچی کیمی ادبی انجمن لرده گورسندیگینه باخمایاراق، درین دویغولو، آچیق فیکیرلی و اینجه خیاللی بیر شاعیردیر. بوجور ادعاسیز شاعیرین ساغلیغیندا تانینماغی البته چتین اولار. مرحوم حقی مختلف ژانرلاردا شعرلرین یازمیش دیر، آنجاق اونون شعری نین چوخ قیسمتین غزللر تشکیل وئریر. حزن، لیریکا، گیلئی و… غزللرین داد – دوزون اوخوجوسو اوچون مهیا ائله ییر. آنجاق بوردا وئریلن معلومات ۱۳۹۲/۰۷/۰۳ ده دونیاسین دییشن مرحوم کریمی حقی نین ادبی دونیاسی نین بیر ذره جن انعکاسی اولابیلر. مرحوم شاعیر کریمی حقی نین «آراز بویلو آرزولاریم» عنوانلی کیتابیندان بیر قوشما اثری ایله سون اولاراق مرحوم شاعیریمیز جناب حاجی اکبر کریمی حقی نین دونیاسین دییشدیگی نین ایکینجی ایل دونومو موناسبتی ایله جولفا شورا باشکانی جناب دکتر حسن فدائی شجاعی، بلدیه باشکانی جناب مهندس ایرج آذرنژاد، آشنالارینا، دوستلارینا هابئله قلمداشلارینا باش ساغلیغی وئریریک.

«دونیا»

دونیا یالان دئییل مطلق دی خلقت،

اینسانین الییله گؤتورمز بدعت،

ازلدن یارانیب بودور طبیعت،

کیم دئییر کی دونیا یالان دونیادیر؟

ازلدن یارانیب قالان دونیادیر.

زمانه دیر گلیر گئدیر دولانیر،

کیمسه دلی اولور کیم آغیلا نیر،

بیریسی آلدانماز بیری آلدانیر،

کیم دئییر کی دونیا یالان دونیادیر؟

ازلدن یارانیب قالان دونیادیر.

گئچن گؤروب گلنلرده گؤره جک،

بیری سئویله جک ، بیری سئوه جک،

اؤز سهمینی بو دونیادان بؤله جک،

کیم دئییر کی دونیا یالان دونیادیر؟

ازلدن یارانیب قالان دونیادیر.

باخ دونیادا تانری وئرن نعمته،

یاشاماغین طرزی قالیب همّته،

توهین اولماز یاراتدیغی خلقته،

کیم دئییر کی دونیا یالان دونیادیر؟

ازلدن یارانیب قالان دونیادیر.

بو دونیانین غصّه سی وار، غمی وار،

یارانانین یقین بیل عَدَمی وار،

طبیعتین جؤرو وار، سیتمی وار،

کیم دئییر کی دونیا یالان دونیادیر؟

ازلدن یارانیب قالان دونیادیر.

ائله یارادیب دی بیزی یارادان،

بیرین قورولوقدان، بیرین دریادان،

روزی میزی وئریب ارض و سمادان،

کیم دئییر کی دونیا یالان دونیادیر؟

ازلدن یارانیب قالان دونیادیر.

آللاه وئرن برکت دی، نعمت دی،

بئش گون واریق بودا بیزه فورصت دی،

فرق قویماز روزی سی کُلّیّت دی،

کیم دئییر کی دونیا یالان دونیادیر؟

ازلدن یارانیب قالان دونیادیر.

یالان دان یاراتماز خالقِ عالم،

ناشوکور اولماسین نه اولار آدم،

وئرمه ییب بیرینه غملر اوسته غم،

کیم دئییر کی دونیا یالان دونیادیر؟

ازلدن یارانیب قالان دونیادیر.

بیرینه میدان دی بیرینه زیندان،

هرایکی عمله مالک دیر اینسان،

بیری خئیر آپاریر بیریسی زیان،

کیم دئییر کی دونیا یالان دونیادیر؟

ازلدن یارانیب قالان دونیادیر.

بو دولو دونیانین نعمتی بیزیم،

خلقتین عزّتی، شوکتی بیزیم،

حسابا گلمه ین ثروتی بیزیم،

کیم دئییر کی دونیا یالان دونیادیر؟

ازلدن یارانیب قالان دونیادیر.

هریانا باخیرسان گول دور چیچک دیر،

بیرلیک اولسا حیات خوش گله جک دیر،

گوللری الوان دیر لئچک لئچک دیر،

کیم دئییر کی دونیا یالان دونیادیر؟

ازلدن یارانیب قالان دونیادیر.

نعمتین بوللوغو حسابا گلمز،

بئله بیر نعمتین کیم قدرین بیلمز،

تانری وئرن نعمت یئردن اوزولمز،

کیم دئییر کی دونیا یالان دونیادیر؟

ازلدن یارانیب قالان دونیادیر.

یازین فصیلینده قاری یاغیشی،

قیشدا مژده وئرر باهار گؤروشو،

نقصان قبول ائتمز تانری نین ایشی،

کیم دئییر کی دونیا یالان دونیادیر؟

ازلدن یارانیب قالان دونیادیر.

باش وئریب، ال وئریب، آیاق دا وئریب،

سای بدن، بندین نه سایاق دا وئریب؟

گؤز وئریب، قاش وئریب، قولاق دا وئریب،

کیم دئییر کی دونیا یالان دونیادیر؟

ازلدن یارانیب قالان دونیادیر.

بیزی دولاندیران باش دی، آیاق دی،

بیز سهو ائتسک خلقت اؤزو اویاق دی،

بیز زامانا، زامان بیزه دایاق دی،

کیم دئییر کی دونیا یالان دونیادیر؟

ازلدن یارانیب قالان دونیادیر.

بیری گلیر بئش گون آتین اوینادیر،

ییغیر دؤره سینه لاتین اوینادیر،

عؤمرونو هدره ساتین اوینادیر،

کیم دئییر کی دونیا یالان دونیادیر؟

ازلدن یارانیب قالان دونیادیر.

بئله بیر نعمت لر یالان دیر مگر؟

بئله بوش ادّعا اولان دیر مگر؟

یالان دونیا بویو قالان دیر مگر؟

کیم دئییر کی دونیا یالان دونیادیر؟

ازلدن یارانیب قالان دونیادیر.

چشمه لر قایناشیر داغ دامنیندن،

چمن یویور اؤزون صوبح شبنمیدن،

ویریر باشین داشا اؤز کؤندَمیندن،

کیم دئییر کی دونیا یالان دونیادیر؟

ازلدن یارانیب قالان دونیادیر.

فلگین دؤرونون کج رَویشی وار،

یازی یایی پاییزی وار قیشی وار،

کج گردیشین حیات ایله ایشی وار،

کیم دئییر کی دونیا یالان دونیادیر؟

ازلدن یارانیب قالان دونیادیر.

قسم اولسون دونیانین آللاهینا،

((حقی)) یم امودوم وار درگاهینا،

دوزون یازسام آلسین اؤز پناهینا،

کیم دئییر کی دونیا یالان دونیادیر؟

ازلدن یارانیب قالان دونیادیر.

«کریمی حقی عاییله عوضولری»

 

بو کیتابی آلماق اوچون هادیشهر، امام حسن(ع) میدانی، اصغرزاده پاساژی اوفوق کولوتورل ایشچیلیک توپلومونا رجوع ائده بیلرسیز.

تلفون نومره سی: ۴۲۰۵۱۸۸۲-۰۴۱