به گزارش موج ارس جلفا [1]، تیرافیک ده قالمیشوخ. چای قیراغیندا. ماشینلار قاریشقا کیمین یول گئدیرلر. من ده نئچه ساعاتدی بلکه ده اصلن نئچه گوندی کی خط-ی-واحید ایچیندیهم! «اوغلان بو نه ایشایدی آخ من گؤردوم؟». من بوگون «انیشتین»ـین دئدیغی «نسبیت نظریهسی»ـنه ایمان گتیرمیشم. زامان اوزانا بیلر، قالیب هانسی شراییط ده اولاسان. زامان اوزاندیخجان، من ده الیمده اولان قره نایلونون دویونون برکیدیرم…
خط ایستگاهینا گلنده یولومی «کرهنئی خانا» دان سالدیم. اوردان گئتماغی چوخ سئوهرم. هم کسمه یول ساییلار هم ده کی تاماشالیدی.
رح به رح میوهلر، رح به رح سسلر. «هولو دی… سولو دی»، «فیرنگی دی فیرنگی، گل آپار یئرکؤکولردن» و منیم لاپ سئودیغیم سس «یئرآلما، سوغان، ساریمساااااخ» و بو ساریمساغی ائله دییهر کی ائلهبیل آدامین آدین سسلیر، آدام آز قالار چؤنوب دییه: «جانا؟! منی سسلهدین؟!».
آما بوگون بو رحلر و سسلر کناریندا بیر آیری شئی ده واریدی. بورنوما بیر ایی دولدی بورنومدان دولانیب چیخدی بئینیمه، بئینیم ده بوتون نورونلاری قیدیخلادی! بئیین دستور وئردی کی دور. دوردوم، باخدیم. تورشولار منه گؤز ویریردی. تورشونون او ایتی سیرکه اییی ساریمساخ اییینن بیرلیخدا منی مندن آلیردی. ایستیردیم گئدهم آما ایاقلاریم گئتمیردی. «آه گول کلملر… آه گول کلملر! سیزی آخ من نئجه بوردا بوراخیب گئدیم؟». آغزیمین سویو آخا آخا دئدیم «قردش تورشولارین نهجوردی؟». دئدی: «لاپ گؤزلدی. هرکیم آپاریب گینه گلیر آپاریر». دئدیم «بیر کیلو چک من آپاریم»، کی کاش دیلیم توتولاردی دئمزدیم، تورشو الیمده میندیم خطه کی کاش قیچیم سیناردی مینمزدیم!
خط-ی-واحید ده دییرم بس نئچه گوندی یول گئدیرم. ساریمساخ قوخوسی هر یئری گؤتوروب. «تیرافیک نه دییر با بو آرادا؟ شهرداری دا وقت تاپدی هر یئری سؤکوب کؤرپو ایشلهماغا؟». خط بیر ذره یول گئدیر باسیر تورموزا، تورشو چالخالانیر قوخوسی لاپ بترلهشیر، من نایلونون دویونون برکیدیرم آما مهیه بو ایی کسیله؟ کناریمدا اوتوران کیشی بیر آیری صندل بوشالماغینان دوروب یئرین دهییشنده منیم باشیما ائله بیل بیر یئکه قازان قئینر سو بوشاتدیلار. دا یاواش یاواش دییرم بس جماعتین هر بیر حرکتی منه خاطیر دی: «او نیه اؤجور باخدی منه؟ حتمن اورهیینده منه یامان دئدی ها… او نیه اؤجور الین آپاردی قویدی اوزونه؟ حتمن بورنون توتوب ها… بو اودکولون اییی هاردان گلیر؟ حتمن بیری اویان بویانا اودکولون ویریر ساریمساخ قوخوسی کسیلسین… ایوای او نیه دوردی پنجرهنی آشدی؟ حتمن بوغولور ها». ایکینجی نفر ده کی گلیب منیم کناریمدا اوتورماغینان دوروب یئرین دهییشدی من بیلدیم کی دوغرودان ایش یاشدی و اوردا کی گؤردوم بیر نفر الیندهکی گؤیلردن جعوریلرین چکیب چیخاردیر سورا باسیر آغزینا – دا بیلمیرم بو ایشی خط ده آجالدیغین دان گؤروردی یا دا ساریمساخ قوخوسونان موباریزه اوچون – من دوردوم خط دن یئندیم. هئشکیمین اوزونه باخمادیم. هئش شوفئره اللریین آغریماسین دا دئمهدیم، فقط یئندیم. دا ماشینا زادا مینمهدیم، ائوهجن پیاده یول یئریدیم. اولسون! ورزیش اولدی، تورشو دا بتر یئمهلی دی، سیز ده بویرون…